Осум тимови од Формула 1 кои се одлучија да стартуваат со сопствено натпреварување сепак се откажаа од своите намери. Цехот го плати претседателот на ФИА кој конечно се повлекува идната година. 

Ферари, Мекларен, Браун ЏП, БМВ-Заубер, Рено, Тојота, Ред Бул и Торо Росо денеска постигнаа договор со претседателот на Меѓународната автомобилска федерација(ФИА) Макс Мозли, со што завршија стравувањата за распад на Ф1.

По состанокот, Мозли соопшти дека нема повторно да се кандидира за претседател на ФИА, на изборите што треба да се одржат овој октомври. Мозли е на чело на ФИА од 1993 година.

„Нема да се кандидирам в година. Си одам, така што конечно ќе има мир“, рече Мозли.

Водечките тимови во Ф1 беа во судир со Мозли поради новите правила за следната сезона. Според тие правила, тимовите мораа да се согласат на ограничување на своите буџети на 40 милиони фунти. На оние што ќе го прифатат ограничениот буџет им беше ветувана поголема слобода кога се во прашање техничките решенија за болидите.