Германскиот судија Бабак Рафати кој се обиде да изврши самоубиство непоредно пред натпреварот од Бундес-лигата меѓу Келн и Мајнц, се наоѓа во болница и се опоравува од повредите што самиот си ги нанесе.

Имено, Рафати се обиде да се самоубие сечејќи си ги вените, но за среќа навреме бил откриен и пренесен во болница. Претседателот на Германската фудбалска федерација, Тео Цванцигер истакна дека Рафати е под посебен надзор и дека ќе мора да помине одреден период додека повторно му се врати на судењето.

„Судијата Рафати е добро згрижен и во моментов се опоравува од повредите, а лекарите се обидуваат да ја вратат и неговата психолошка состојба во нормала. Се надеваме дека со него се ќе биде в ред и дека по одреден период повторно ќе можеме да го гледаме на стадионите во Бундес-лигата“, изјави Цванцигер.

Германските медиуми почнаа да шпекулираат и со причините за обидот за самоубиство и според нив, големите долгови се причина за Бабак Рафати да посегне по својот живот, но сеуште нема официјални информации во врска со случајот.