Германскиот гигант Баерн Минхен започна преговори со тренерот на Баер Леверкузен, Јуп Хајнкес, кој по трет пат треба да застане на чело на клубот кој е рекордер по бројот на титули во германското фудбалско првенство, соопшти денес претседателот на баварскиот клуб, Ули Хенес.

„Генерално и двете страни се заинтересирани. Ќе започнеме преговори во следните неколку дена. Верувам дека ќе постигнеме позитивен резултат од нив“, изјави Хенес за "Оснабрукер цајтунг".

65-годишениот Хајнкес, ќе го напушти Баер Леверкузен по крајот на сезоната. Тој го доведе Баерн Минхен до две титули во Бундеслигата при својот прв престој на тренерска клупа меѓу 1987 и 1991 година.

Вториот пат ги водеше Баварците во последните недели на сезоната 2008/2009-та, кога беше отпуштен Јирген Клинсман, а сега на тренерското место треба да го наследи Холанѓанецот Луис ван Гаал, кој го напушта клубот по крајот на сезоната.