Националниот тим на Македонија од вчера е во Охрид каде во наредните денови ќе се подготвува за претстојните квалификациски средби со Норвешка и Исланд.

На првиот тренинг в недела се појавија 11 фудбалери, а четворица кои задоцнија (Ивановски, Лазаревски, Грнчаров и Мазнов), го следеа тренингот. Денес се очекува репрезентацијата да се комплетира со доаѓањето на Седлоски, Наумовски, Тасевски и Филип Деспотовски кој вчера ја освои титулата во купот со  Воскла откако во финалето го совладаа Шахтјор со 1-0. Се очекува сите фудбалери да се појават на тренингот во 18ч. на „Билјанини извори“.

На пресот организиран од ФФМ после првиот тренинг селекторот Јонуз изјави: “Се подготвуваме за вториот тренинг на кој очекувам да присуствуваат сите повикани фудбалери.“

“За нас е најбитен сега здравствениот билтен и добро е што и Новевски полека се опоравува и најверојатно ќе биде способен да ги издржи напорите. Ќе работиме тренинг во две групи. Оние што допатуваа вчера- вечер и денеска ќе одработат лесен тренинг, а останатите ќе работат со зголемен интензитет, воигрување на техничко – тактички задачи.“

“Првите информации од мојот соработник Гого Јовчев говорат дека сите тројца кандидати за голманската позиција се во добра психо-физичка кондиција и во добра форма и очекувам тоа да го потврдат на тренинзите и во моментов најподготвениот ќе ја добие и шансата за настап.“

“Што се однесува до утрешниот ден ќе имаме специјален режим на работа и фактички започнуваме со реализирање на тактичките задачи и директните подготовки за нашиот прв противник Норвешка. Предвидено е и гледање на видео снимки од средбите на Норвешка со Ј.Африка и Холандија.“