По драматичните 120 минути, во кои и двата тима имаа свои шанси пресуди 121 минута. Во последните секунди Гијан промаши пенал, кој можеше да ја одведе Гана до највисокиот успех во историјата. На крајот Уругвај беше поуспешен од белата точка.
Уругвајците подобро го почнаа мечот, доминираа на средината на теренот, но само до противничкиот шестнаесетник каде неприкосновена беше одбраната на Гана. Најдобрата шанса ја имаа во 26 минута, откако Суарез одлично биеше, но Кингсон исфрли во корнер.
Во завршницата од првото полувреме се повреди уругвајскиот капитен Диего Лугано, кој во 38 минута мораше да биде заменет од Скоти, што целосно ја деконцентрираше одбраната на јужноамериканците, па Гана се повеќе се закануваше, а како резултат дојде и голот на Мунтари од 30-тина метри во последните мигови од првиот дел.
По 15-те минути пауза, Уругвајците се консолидираа и многу брзо израмнија. Пантсил со прекршок го запре Фусиле на 20-тина метри од левата страна, а Диего Форлан од слободен удар постигна прекрасен гол, по грешката на голманот Кингсон.
По израмнувањето се играше рамноправно, а и двата тима имаа шанси за гол, но без резултат. Следеа продолженија, во кои исцрпените репрезентации се трудеа повеќе да го зачуваат својот гол, но во самата завршница, во 121 минута се случи пенал за Гана.
Во гужва пред уругвајскиот гол Суарез прво со нога од гол линија го исчисти ударот на Апија, а само неколку секунди подоцна мораше со рака да го одбрани ударот на Адија, па португалскиот судија Бенгеренса му даде црвен картон и пенал за Гана.
Но, Асамоа Гијан од белата точка ја погоди гредата и пропушти да и донесе историски пласман на својата земја.
При изведувањето на пенали, голманот Муслера беше вистински херој, кој ги одбрани ударите на Џон Менсах и Доминик Адијах, а победничкиот погодок за Уругвај го постигна Себастијан Абреу и тоа на ризичен начин.
Уругвај во полуфиналето ќе се сретне со Холандија, која го победи Бразил со 2:1.
Каде ќе заврши Тевез?
